تاجر كبير فى السوق
وله شنه كمان رنه
وله وكاله لها كام باب
يجيلوا فطاره فى مشنه
بتقتل جواه الحرمان
طول عمره شارب المحنه
كان شاب فقير قوي وغلبان
كانت فى جلابيته كام رقعه
وكان فيها كتير ألوان
عرف طريق الجناين
شاف النعمه صبح طمعان
قال راح اعافر مع الدنيا
ويكون لي فيها مكان
خد السبوبة والتانية
والعز ظهر عليه وبان
بنى قصر وبجنينه
يبصلها يبات فرحان
وعالسفرة كام أكلة
وليله نهارة مش شبعان
سنين الجوع سابت ذكرى
مش قادر ينسى شكله زمان
والعمر مر بيه ولسه
لافكر فى زوجة ولا غلمان
من الأهل مالوش عيلة
ولا يعرف لأهله مكان
عايش فى الدنيا للقمة
وللمال وكام فدان
قسيتي عليه يادنيا
وسقتيه كاس الهوان
لامال نافعه ولا هدمه
ولا أهل ولا خلان
وبكرة يفوتك يادنيا
مايبكي عليه لاإنس ولا جان
(((أسامه جديانه)))
ليست هناك تعليقات:
إرسال تعليق