ـــــــــــــــــــــــــــــــــــــــــــ
ضَاع القُدس وِضَاع الأقْصَى
وِاحْنَا جِبِلَّه تِهِــــــزِّنَا رَقْصَه
نِعْتِب نِشْجِب وَالله مَا نَاقْصَه
دَه بِالتَّخْوِيف ضَيَّعْنَا الأقْصَى
قُولْنَا تِرَامْب هَيِبْقَى مَعَانَا
وَآدِي تِرَامْب اِبن النَّاقْصَه
خَد عُرُوبِتْنَا وِهِيَّا فْي ايدْنَا
لَمَّا قُولْنَا الطَّاعَه يَا سِيدْنَا
خَد أمْوَالْنَا عَشَان يِسْمَعْنَا
قَام نَسَّانَا كَمَان مَدِينِتْنَا
هَوِّد فِيهَا كَمَان قَطَّعْنَا
وِبَعْدِ القُدْس ضَاعِت كَرَامِتْنَا
إمْتَى يَا نَاس مَرَّه هَنِتْوَحَّد
وِتِبْقَى إيدِينَا فِي إيدِين بَعْض
وِنْقُول لِلفُرْقَه لأه هَتِبْعِد
وِكْفَايَه ضِعْنَا كِتِير فِي البُعْد
دَه مَهْمَا ضِعِفْنَا الوِحْدَه تِقَوِّي
مَا يِقْدَر حَد يَاخُدْهَا الأرْض
دِي هِيَّا العِرْض وِهِيَّا العِزَّه
مِن غِير أرْض نِبْقَى هَفِيَّه
تِضِيع كَرَامِتْنَا وْيَاخْدُوهَا غَزَّه
مِن غِير أرْض مَافِيش قَوْمِيَّه
فِينُو صَلاَح وِكَمَان حَمْزَه
مَاحَدِّش عَنْدُه يَا نَاس وَطَنِيَّه
إيه لَزْمِتْهَا العِيشَه مَادَام
عَايْشِين بَس عَشَان نِدَّاس
لإمْتَى هَنِغْرَق فِي الأوْهَام
نِبُوس الكَف بَقِينَا مَدَاس
تِبْقَى المُوتَه وَاللهِ أرْحَم
فِي إيدَك سِيف أو حَتَّى الفَاس
لَو مُت شَهِيد هَتْكُون الأعْظَم
يَا إمَّا تِعِيش مَرْفُـــوع الرَّاس
ــــــــــــــــــــــــــــــــــــــــــ
كلمات الشاعر أحمد شاهين
----- مصر - أسيوط -----
ليست هناك تعليقات:
إرسال تعليق