سيادة الرئيس.....معالى الوزير
سيادة المحافظ...جناب السفير
دى شكوى بسيطه كتَبها فقير
كُل اللّى حِيلته ذِمّة وضمير
وهِدمه قديمه وفَرشه حصِير
ودمعه بتجرح فِ خدُّه الحرير
وليلته حزينه وحِلمه أسير
شايف مرايته فيها حكايته
أسرار تِملى مليون بِير
كاتب بيقول بِ خط خجول :
(بُصوا وشوفوا معايا ياساده
عاوز منكم بس إفادة
دا احنا تعبنا من التفكير
حالِى ملخبط وانا متمرمط
ماشى بكلّم نفسى كتير
حتى عَلامى وبعدُه شهاده
حبر ف ورقه لِ التصوير
إفتحوا لحظة بقى الحنفّيه
دا احنا تعبنا من التقطير
قُوتنا بيغلى وسعره بيعلى
حتّى رغيفنا دا فِيه مسامير
ليه تتعاملوا معانا بمبدأ
إنتم أذكى واحنا حمير
شايفين لينا كام مستقبل
هو الواحد فينا ضرير!!
مشاريع وهم وكدب وغم
إعلام مبنى عَ التزوير
لسه كمان بتقولوا استحمل
واعمل دفتر للتوفير!
ضحكتونى خلاص بكفايا
قلبى خفيف والله باغِير
صبرى عشَايا ونومى خفيف
مهضوم حقى لأّنى شَريف
حِلمى بيزهق منّى يطير
أنا مش لاقى اللقمه أَكلها
حتى علاجى عاوز جمعيه
بس انا خايف أبقى أخير
أه مِ القهر وكسر الضهر
عِش ومليان بالدبابير
رُدّوا وقولوا فين أحلامنا
واوعوا تقولوا ف بطن الزير
شكوي بجد كَتِبها انا فيكم
شكوى ومش هابعتها ليكم
أنا هابعتها ل رب قدير
قادر يحكم بينا بِ عدله
والمظلوم يبقىٰ لُه نصير)
خلاص ياسادة نقَلت الرساله
شكوى بسيطه كتَبها فقير
..............
الشاعر محمد زهران
ليست هناك تعليقات:
إرسال تعليق