أحلام هزيلة
==========
أنا من زمااااااااان كنت بحلم
بس يا خساره
أحلام هزيلة اتكسرت
مع كل زفرة آه
وكل دمعة بتتولد ف ليل طويل
وكل راحة بتختفي ورا ألف ميل
مبقاش فاضل لي غير شوية دمع
اتحجروا
واتجبروا
صبحوا شظايا ع الخدود
زي الحدود
وانا لسه وحدي بنتظر
إن الصباح مره يجود
لكن محال
اللي اتنقش فوق الرمال يصبح بيوت
أنا نفسي اموت
لكن بموتي الحظ يفتح سكته
لحاجات تفوت
ما هو مستحيل العيشه تفضل عنكبوت
الزرع الاخضر ف الجناين موتوه
والنور علي وش القمر ضلموه
والناس حياري ف سوق نخاسه
سوق نجاسه
كل حاجة فيه مباعه
حتي إسمك
حتي رسمك
حتي حسك
حتي الفراسه
من الآخر صرنا كناسه
يبقي ليه أحلم جديد؟
والأماني كلها ف قفص حديد؟
والأغاني صوت نواح مش صوت سعيد
سيبك انت م اللي واخد ف الفرح دور المهرج
أخرتها ايه غير ييجي غيره
يلعب الدور الأكيد
اللي يضحك
أو يسري
أو يخللي السوق سعيد
لكن تقول لي حلم تاني
وعمر تاني!!!!!
ولا شئ يفيد ###
بقلمي/ إبراهيم فهمي المحامي
26/7/2017
ليست هناك تعليقات:
إرسال تعليق