Tarek Elsayed
((حواديت مصرية))قالوا زمان
قول قالوا إيه
قالوا كلام
ودا يطلع إيه
إللي ماشاف بعنيه اللحمة
شاف الليّة ياعيني إتجنن
مد ف إيده وقال بالرحمة
ردوا عليه وقالوله يحنن
قالوا زمان
قول قالوا إيه
قالوا كلام
ودا يطلع إيه
إللي بيجي على الغلبان
عمره ف يوم مايكون كسبان
وإللي يخاف من شكل الحبل
بيكون لدغه أكيد تعبان
ربك يدي قليل الحيلة
رزق مايتكيل بالكيلة
والحدق إللي عاملي مفتح
بتجيله خيبة بستين نيلة
قالوا السبع بدون أنياب
تلعب بيه النسانيس الكورة
وإللي بيهرب م الميتدين
عمره في يوم مايبان في الصورة
قالوا زمان
قول قالوا إيه
قالوا كلام
ودا يطلع إيه
قالوا الراجل مش بشنابه
وإلا الفار يصبح سي جنابه
وإللي ماواخد باله يفتّح
ياما الحاوي شايل في جرابه
إللي بيخرج يوم من داره
يستاهل قلة مقداره
وإللي يخطي الخطوة يحاسب
قبل مايبدأ بيها مشواره
قالوا زمان
قول قالوا إيه
قالوا كلام
ودا يطلع إيه
قالوا إللي يشخلل بيعدي
وإللي ماشخلل تنو مكانه
وإللي هرب مركب وتودي
يغور مايقولنا فين عنوانه
والبلد إللي ماعارفك فيها
أيها حد إتشقلب فيها
لكن حاسب شقلباظاتك
تجيب ياخرونج عاليها واطيها
لما حمار يجي يطلع مطلع
بالكرباج إديله هيطلع
لو نهق لك سايس فيه
- فالوا زمان
- قول قالوا إيه
- قالوا كلام
- يطلع إيه
- قالوا زمان الناس ياخسارة
عشان الدنيا دي زي خيارة
يوم في السلطة ويوم إخييه
- إخيه إخيه ياسعادة البيه
أحيه أحيه قول قصدك إيه
- قالوا زمان إللي إختشوا ماتوا
وإللي إتجرأو عدوا وفاتوا
فضيحة تعدي هيختشوا ليه
هيختشوا ليه !! أحيه أحيه
قالوا تاني إيه ياسعادة البيه
- قالوا علشان
- علشان إيه
- علشان تقدر يابني تعيش
في الدنيادي وتاكل عيش
طاطي البصلة وقول ميرسي
- قلت الدنيا دي عالي وواطي
يوم بتزغزغ تحت ابطاطي
وتاني يوم لحمي بتنهش فيه
قالوا وقالوا زمان ياما قالوا
سمعنا ما قالوا وقلنا وماله
بس ما قالوا آل إلى إيه
آل إلى إني أطاطي البصلة
وبعد ماطاطي أقول ميرسي
أحيه أحيه ميرسي على إيه
أحيه أحيه ياسعادة البه
أكلها بدقة وأعيش بجنيه
ولا إني أطاطي في راسي يابيه
بقلم طارق السيد
بقلم طارق السيد
ليست هناك تعليقات:
إرسال تعليق