وأنا مثل وطني لست بخير
ـــــــــــــــــــــــــــــــــــــ
ها مين هيقولنا
يعني إيه ثورة ؟
الثورة في بلدنا مناورة
يمكن تصيب
بس دايما عندنا تخيب
لا نافع معاها سب
ولا ضرب ولا حتى محاورة
راحة وجايه سارقها العتاولة
راح النظام كنا معاكم
جه النظام ايه وداكم
والغلبان عايش في توهان
لا لاقي لقمة
ولا هدمه لابنه العريان
ونفقة الدولة خاصة بالاعيان
شوية كحة ولسعة برد
يقولوا ياه دا البيه عيان
بسرعة يسافر بره
بتذكرة على حسابنا كمان
والفقران في بلادنا جعان
وفي داهية ابنه التعبان
استنى اسمع خد دي كمان
الثورة في بلدنا بتنجان
وعليها شوية صلصة
وحتة كوسة وحبة ريحان
من جوه ريحة معفنة
ومن بره غريبة ورمان
الثورة فى بلدنا زي البركان
تنفجر يموت الناس
ونعزي فيهم وبعد الدفنة
كله يرجع زي ما كان
اه يا جنس بشر العوبان
وممكن نطلع جتتهم
ونعمل عليها زار ومزاد
ونبيع فيها بدعاية واعلان
بيتاجروا حتى فى الموت
امال لو عاشوا الحرمان ؟!
خلصت كلامى ومش عارف
معنى الثورة ومش شايف
إلا سواد اليوم
وخايف بكره افضل خايف
خلصت كلامي ومش عارف
معنى الثورة ومش شايف .
ـــــــــــــــــــــــــــــــــــــــ
محسن البحراوي
23-2-2016 م
ليست هناك تعليقات:
إرسال تعليق